Sajak Nu Kaliwat

jungjunan!
mugi qalbu urang duaan
caang padang narawangan
taya mega nu ngahalang mindingan ka asih urang
siga langit wengi ieu nu lenglang
baranang di hias ku cahaya bentang

jungjunan!
gedur ombak sagara kidul
moal malidkeun kalangkang urang katukang
mangsa meungkeut geugeut sahandapeun sariak layung
nu beureum kasorot panon poe sore harita

jungjunan!
wengi ieu, caangna qalbu lenglangna langit
heosna sora angin nebak kana dangdaunan
jadi hariring ka eling pasini nu teu kungsi nyanding
jadi sajak nu kaliwat dina gurat tiap lengkah
marengan anjeun di alam kalanggengan
mapag balebat isukan ti langit wetan


Ae,Leuweung Sancang 2008

Tembang Ka Waas

kari - kari nurih wanci
ngikrikna sora jangkrik
patembalan jeung sora bangkong
di tempas ku sora caricangkas
di lampuan ku cika - cika nu sing kariceup
nyata wirahma buana ngagugah rasa
muka lalangse sajeroeun waragad zaman

mirig wanci hiliwir nurih ati
nu jumerit nyawang ringkang mangsa katukang
tatapakan gerak jeung gerikna
nu limbung ku kaangkuhan
nyapirakeun kiceupna cika-cika

gerik diri gerak raga
siga benang kusut nu kapagut
ngagulung taya guna jeung faedahna
boro-boro inget ka gusti
nu adan ge di sebut jelema edan

kari - kari nurih wanci
jumerit rasa hayang neang cika - cika
rek menta cahaya dina kiceupna
najan ukur sajorelat keur nyaangan poekna diri


Ae, Sumedang 2011

Lain Tatarucingan

siga balap motor jipi jeung motor tu

atawa balap formula hiji

nungguan aba - aba ngajajar di tukangeun garis star 

siap ngagas ninggalkeun no star masing - masing

silih siap dinu lempeng atawa silih salib di tikungan

nembongkeun ka ahlian masing - masing

ngadu otak ngadu tanaga 

paheula heula muru garis pinis nu tadi jadi asal muasal

garis keur ngamimitian kajuaraan

sangkan bisa naek podium ngangkat piala 

tur jadi juara

teu jauh beda jeung kahirupan

silih sigeung lakon nu ngalalakon hirup

pedah teu apal posisi awal komo deui hasil akhir

teu bisa di tebak sabab lain tatarucingan

nu pentingmah kumaha carana mereskeun ieu puteran

ngeusi kahirupan ku kahadean samemeh nepi ka garis pinis

ngarah teu siga nu balap liar

ngahariwangkeun malah sakapeung sok ngarugikeun batur

Abdie,008072012

 

Sapotong Sajak

duh jungjunan!
asih ieu lain kawih rahwana
nu ngalentab ngaduruk waruga
tapi saestuna hariring rasa
nu ngarakrak kaagungan kalimah cinta

duh jungjunan!
cinta ieu lain paribasa
dina puisi atawa carita pondok
tapi saestuna ka asih nu ngahirupan
sapotong sajak


Abdie,07082012

Nagri Baruntas

nanjak lampah marengan peuting
mawa gembolan kanyaah tadi beurang
pamere angin nu niup embun - embunan
basa kuring nangtung nitenan papan iklan
nu nawarkeun rupa - rupa jaminan kahirupan
kahirupan pikeun kulawarga jeung parteyna sewang-sewangan

teu kungsi lila,
heong sora sirine mobil pulisi
di tuturkeun ku abringan rombongan
teu malire kanu antrian kandaraan sejen
teuing mobil pejabat teuing kendaraan penjahat
da sarua di kawal ku pulisi

beuki lila beuki karasa
panon poe asa ngalentab
ngaduruk punduk siga nu nitah tungkul
dina gumuruhna renghap nu minuhan dayeuh
tepi ka amprok, tenjo kuring jeung indung suku
ngajak leumpang mapay laratan nagri baruntas
nu leungit, siga haseup roko kuring katebak angin
ilang tanpa laratan





Abdie,070812

Kalangkang Anjeun

Kalangkang anjeun!
rumingkang ngambah jomantara
ngolebat sahandapeun mega
neang sampurna dina bodasna

kalangkang anjeun!
ngapak jangjang mawa kaheman rasa
tina lungkawing tur petengna jungkrang
nyukcruk mahkota siger asih dewata

kalangkang anjeun!
ngajorelat ngudag srangenge
nu turun di lembah lengkob
lengkob nu ngamprokeun beurang jeung peuting

kalangkang anjeun!
eunteup dina susuhunan
ngaburak waragad ruruntuhan
napak pituduh nuju pangiuhan

kalangkang anjeun!
nyaluuh di lawang guha
nitenan asal lampah jeung rumingkangna
luhureun cadas, basisir tur jomantara

lur alur ngidung ngabalur
cik rincik ngawih ngarincik
marengan hiliwirna angin peuting
ngagiring kalangkang samemeh nutup jangjang



Abdie,07072012