Sajak Panimu

ieu sajak meunang manggih
tina tumpukan runtah jeung dadaunan
nu ngeusian kaleng - kaleng kahirupan

ieu sajak meunang manggih
ti wahangan nu pinuh ku cai mata
sesa ngamandian layon- layon

ieu sajak meunang manggih
tina kaleng - kaleng kahirupan
nu pinuh ku layon korban kasarakahan

ieu sajak meunang manggih
ti nagri nu pinuh ku jalma sarakah
nu ngadiukan korsi di pamarentahan

ieu sajak meunang panimu
ti hareupeun kantor pengadilan
wayahna lamun ka ambeu bau
lantaran kaadilan kiwari ngan tinggal bugang


Abdie,2012