Asih Sunda

mawa beja

dina hiliwirna

asih nu nyanding

jeung angin peuting

ngapak mega jomantara

jangjang peuting kumalayang

sahandapeun bulan sapotong

nyaksi hirup sakabeh ingsun

robah mangsa ganti carita

angin peuting ngaguar hiliwirna

nyanding jeung kawasana waktu

asih sunda asihna ingsun

dina angin ngajadi nya'ah

dina seuneu ngajadi deudeuh

dina cai ngajadi geugeut

dina taneuh meungkeut kaheman

asih sunda asihna alam

sahandapeun bulan sapotong

nya'ah, deudeuh tur geugeut jadi kaheman

marengan sakabeh ingsun kumawula kanu kawasa

asih sunda asihna ingsun kaula alam

nunggul yakin sahandapeun caangna bulan

nancebkeun tekad welas asih ka papada jalma

teu paduli rupa jeung ka-ayaanna

Abdie,30072011